અધિકારીઓના જણાવ્યા અનુસાર, મૂશળધાર વરસાદ અને ભૂસ્ખલનથી પ્રદેશના પાંચેય જિલ્લાઓ ખરાબ રીતે પ્રભાવિત થયા છે. અહીં રહેતા લોકોને ભારે મુશ્કેલીનો સામનો કરવો પડી રહ્યો છે. જણાવવામાં આવી રહ્યું છે કે દક્ષિણ ગારો હિલ્સ જિલ્લાના હતિયાસિયા સોંગમા ગામમાં સાત લોકોના મોત થયા છે. ભૂસ્ખલનને કારણે આ લોકો કાટમાળ નીચે દટાયા હતા. આ લોકોમાં ત્રણ મહિલાઓનો પણ સમાવેશ થાય છે. આ સિવાય શ્મી ગારો હિલ્સના ડાલુમાં વરસાદને કારણે વધુ ત્રણ ગ્રામજનોના મોત થયા છે. એટલે કે અત્યાર સુધીમાં કુલ 10 લોકોના મોત થયા છે.

મેદાનોમાં પૂરના કારણે તબાહી

શુક્રવારથી પડી રહેલા વરસાદને કારણે ડાલુ વિસ્તાર અને પશ્ચિમ ગારો હિલ્સના મેદાનોમાં પાણી ભરાઈ ગયા છે, દક્ષિણ ગારો હિલ્સના ગસુઆપારા પણ ખરાબ રીતે પ્રભાવિત છે. જ્યાં એક પુલ ધોવાઈ ગયો છે. રાજ્યના મુખ્યમંત્રી કોનરાડ કે સંગમાએ શનિવારે ગારો હિલ્સમાં ચાલી રહેલી પૂરની સ્થિતિની સમીક્ષા કરી હતી. આ દરમિયાન તેમણે અધિકારીઓને આપત્તિનો સામનો કરવા માટે નિર્દેશ આપ્યા હતા.

મૃતકના પરિવારજનોને એક્સ-ગ્રેશિયાની રકમ આપવા સૂચના

સીએમએ જાન-માલના નુકસાન અંગે પણ દુઃખ વ્યક્ત કર્યું હતું. સંગમાએ મૃતકોના પરિવારજનોને તાત્કાલિક એક્સ-ગ્રેશિયા રકમ આપવાનો પણ આદેશ આપ્યો છે. આ સાથે તેમણે અધિકારીઓને એ પણ સૂચના આપી છે કે જે લાકડાના પુલ ધોવાઈ ગયા છે અને પૂરના કારણે ક્ષતિગ્રસ્ત થઈ ગયા છે તેને ફરીથી બનાવવામાં આવે.

અસરગ્રસ્ત વિસ્તારોમાં બચાવ કામગીરી

એવું કહેવામાં આવી રહ્યું છે કે જાનહાનિ અને અન્ય નુકસાનની વિગતો એકત્રિત કરવામાં આવી રહી છે. રાષ્ટ્રીય અને રાજ્ય ડિઝાસ્ટર રિસ્પોન્સ ફોર્સની ઘણી ટીમો પૂર પ્રભાવિત વિસ્તારોમાં બચાવ કામગીરી કરી રહી છે. ભૂસ્ખલનને કારણે ઘણી જગ્યાએ રોડ કનેક્ટિવિટી ખોરવાઈ ગઈ છે. NDRF અને SDRFની ટીમો લોકોની મદદ કરી રહી છે. પૂર અને ભૂસ્ખલનના કારણે વીજળી પણ પ્રભાવિત થઈ છે. અધિકારીઓનું કહેવું છે કે પ્રદેશના મોટાભાગના વિસ્તારોમાં વીજ પુરવઠો પુનઃસ્થાપિત કરવામાં આવશે. તેમજ રસ્તાઓ પર પડેલા કાટમાળને હટાવવાની કામગીરી કરવામાં આવી રહી છે.

આ પણ વાંચો: Delhi: કેજરીવાલ સપનામાં પણ PM મોદીને જોતા હશે…: મનોજ તિવારી