મીડિયા અહેવાલો અનુસાર, માહિતી અને સંચાર પ્રૌદ્યોગિકી (ICT) રાજ્ય મંત્રી જુનૈદ અહમદ પલકએ જાહેરાત કરી કે સેવાઓ પુનઃસ્થાપિત કર્યા પછી, 5 જીબી ઇન્ટરનેટ ત્રણ દિવસ માટે તમામ વપરાશકર્તાઓને મફત આપવામાં આવશે. સ્થાનિક સમય અનુસાર બપોરે 3 વાગ્યાની આસપાસ મોબાઈલ ઈન્ટરનેટ સેવાઓ ફરી શરૂ કરવામાં આવી હતી.

હિંસા વધ્યા બાદ મોબાઈલ ઈન્ટરનેટ સેવા બંધ
અહેવાલ મુજબ, ઢાકામાં રોબી, ગ્રામીણફોન, બાંગ્લાલિંક (Bangladesh) અને અન્ય ઓપરેટર્સના વપરાશકર્તાઓએ જણાવ્યું હતું કે તેઓ બપોરે 3 વાગ્યાની આસપાસ તેમના મોબાઇલ ફોન પર ઇન્ટરનેટનો ઉપયોગ કરી શકે છે. દેશભરમાં હિંસા વધ્યા બાદ સરકારે 18 જુલાઈના રોજ મોબાઈલ ઈન્ટરનેટ સેવાઓ બંધ કરી દીધી હતી.

સોશિયલ મીડિયા પર ખોટા સમાચાર
અહેવાલ મુજબ, તે સમયે મંત્રીએ કહ્યું હતું કે દેશમાં વર્તમાન સંકટને ધ્યાનમાં રાખીને અને સોશિયલ મીડિયા પર ફેક ન્યૂઝના ફેલાવાને રોકવા માટે આ નિર્ણય લેવામાં આવ્યો છે. સોશિયલ મીડિયા પ્લેટફોર્મના ઉપયોગ અંગે પલકએ કહ્યું કે બાંગ્લાદેશ (Bangladesh) ટેલિકોમ્યુનિકેશન રેગ્યુલેટરી કમિશન (BTRC) એ Facebook, TikTok અને YouTube સહિતના સોશિયલ મીડિયા પ્લેટફોર્મના અધિકારીઓને પત્રો મોકલ્યા છે.

નોકરીઓમાં અનામતનો વિરોધ
તેમણે કહ્યું કે તેમના પ્રતિનિધિઓએ સ્પષ્ટીકરણ આપવા માટે 31 જુલાઈ સુધીમાં ઢાકા આવવું પડશે. ત્યારબાદ તેમની સાથે ચર્ચા કરીને નિર્ણય લઈશું. ઢાકા અને અન્ય શહેરોમાં યુનિવર્સિટીના વિદ્યાર્થીઓએ 1971માં બાંગ્લાદેશ (Bangladesh) ની મુક્તિની લડાઈમાં લડનારા યુદ્ધ નાયકોના સંબંધીઓ માટે જાહેર ક્ષેત્રની નોકરીઓ અનામત રાખવાની પ્રણાલી સામે વિરોધ કર્યો, જે હિંસક બની ગયો.

હિંસામાં 100થી વધુ લોકોના મોત થયા છે
દેશવ્યાપી હિંસા બાદ ઈન્ટરનેટ અને મોબાઈલ સેવાઓ બંધ કરી દેવામાં આવી હતી. સ્થાનિક અખબારના અહેવાલો અનુસાર, હિંસામાં 100 થી વધુ લોકોના મોત થયા છે. જો કે, મૃત્યુ અંગે કોઈ સત્તાવાર માહિતી ઉપલબ્ધ નથી. વડા પ્રધાન શેખ હસીનાએ મંગળવારે હિંસા બાદ કર્ફ્યુનો આદેશ આપવાના તેમના નિર્ણયનો બચાવ કરતાં કહ્યું હતું કે લોકોના જીવન અને તેમની સંપત્તિની સલામતી સુનિશ્ચિત કરવા માટે કડક પગલાં લેવામાં આવ્યા હતા. જોકે, બુધવારે બાંગ્લાદેશમાં સ્થિતિ સામાન્ય થઈ ગઈ હતી.

આ પણ વાંચો: Israeli strike on Yemen: ઈઝરાયલે લીધો બદલો, યમનમાં અનેક હુતી સ્થાનો પર કર્યો હુમલો