Kolkata Doctor Death : પશ્ચિમ બંગાળની મમતા બેનર્જી સરકારે મંગળવારે વિધાનસભામાં બળાત્કાર વિરોધી બિલ રજૂ કર્યું હતું. વિધેયકના ડ્રાફ્ટમાં, દુષ્કર્મ પીડિતાનું મૃત્યુ થાય અથવા બેભાન થઈ જાય તો આવા ગુનેગારો માટે મૃત્યુદંડની જોગવાઈનો પ્રસ્તાવ મૂકવામાં આવ્યો છે. વિરોધ પક્ષ ભાજપ પણ બિલને સમર્થન આપશે.
આ ઉપરાંત, ડ્રાફ્ટમાં દરખાસ્ત કરવામાં આવી છે કે બળાત્કાર અને ગેંગરેપના દોષિત લોકોને આજીવન કેદની સજા કરવામાં આવે. ‘અપરાજિતા વુમન એન્ડ ચિલ્ડ્રન બિલ (વેસ્ટ બંગાળ ક્રિમિનલ લૉ એન્ડ એમેન્ડમેન્ટ) બિલ 2024’ નામના પ્રસ્તાવિત કાયદાનો ઉદ્દેશ્ય બળાત્કાર અને જાતીય અપરાધો સંબંધિત નવી જોગવાઈઓનો સમાવેશ કરીને મહિલાઓ અને બાળકોની સુરક્ષાને મજબૂત કરવાનો છે.
બિલ તમામ ઉંમરના પીડિતોને લાગુ પડે છે
ગયા મહિને કોલકાતાની આરજી કાર મેડિકલ કોલેજ અને હોસ્પિટલની એક મહિલા ડૉક્ટર પર બળાત્કાર અને હત્યા કરવામાં આવી હતી. આ શરમજનક ઘટના સામે દેશવ્યાપી વિરોધ વચ્ચે રાજ્યના કાયદા પ્રધાન મલય ઘટક દ્વારા પ્રસ્તાવિત બિલ રજૂ કરવામાં આવ્યું હતું. હવે આ બિલ પર ચર્ચા થશે. આ ખરડો, જે ભારતીય ન્યાય સંહિતા 2023, ભારતીય નાગરિક સુરક્ષા સંહિતા 2023 અને જાતીય અપરાધોથી બાળકોનું રક્ષણ અધિનિયમ 2012 હેઠળ સંબંધિત જોગવાઈમાં સુધારો કરવા માંગે છે, તે તમામ ઉંમરના પીડિતોને લાગુ પડશે. જો આ બિલ પસાર થશે તો બળાત્કાર અને હત્યાના કેસમાં દોષિતોને આજીવન કેદની સજા થશે. આનો અર્થ એ થયો કે તેઓએ તેમનું આખું જીવન જેલમાં વિતાવવું પડશે અને થોડા વર્ષો પછી તેઓ મુક્ત થશે નહીં. નાણાકીય દંડની જોગવાઈઓ પણ હશે.
#WATCH | Kolkata, West Bengal: Junior Doctors continue to sit at the protest site in the Lalbazar area. They have been demanding justice for a woman doctor who was raped and murdered at RG Kar Medical College and Hospital on August 9. pic.twitter.com/HZ7mfOxAE2
— ANI (@ANI) September 3, 2024
તપાસની સમય મર્યાદા ઘટાડવાની દરખાસ્ત
આ બિલમાં બળાત્કાર સંબંધિત તપાસ પૂર્ણ કરવાની સમય મર્યાદા બે મહિનાથી ઘટાડીને 21 દિવસ કરવાનો પ્રસ્તાવ છે. આ ઉપરાંત ચાર્જશીટ તૈયાર થયાના એક મહિનામાં આવા કેસમાં ચુકાદો આપવાનું વચન પણ આપવામાં આવ્યું છે. બિલ હેઠળ, જો કોઈ આવા કેસમાં કોર્ટની કાર્યવાહી સાથે સંબંધિત કોઈપણ માહિતી પ્રકાશિત કરે છે અથવા પીડિતાની ઓળખ જાહેર કરે છે, તો તેને ત્રણથી પાંચ વર્ષની જેલની સજા થઈ શકે છે.
જો કે કાયદાકીય નિષ્ણાતોનું કહેવું છે કે વિધાનસભામાં બિલ પસાર કરવું પૂરતું નહીં હોય. તે આ સંબંધમાં કેન્દ્રીય કાયદાઓની કેટલીક જોગવાઈઓમાં સુધારો કરવાની દરખાસ્ત કરે છે, તેથી તેને રાષ્ટ્રપતિની મંજૂરીની જરૂર પડશે. સાથે જ બંગાળ સરકારના આ નિર્ણયનો પણ વિરોધ થઈ રહ્યો છે. વિરોધ પક્ષો અને કાયદાકીય નિષ્ણાતો કહી રહ્યા છે કે આવા કેસ માટે રાષ્ટ્રીય સ્તરે કાયદામાં કડક જોગવાઈઓ છે.
આ પણ વાંચો : BJP Gujarat : ભાજપનું પ્રાથમિક સદસ્યતા અભિયાન, સી.આર.પાટીલે મુખ્યમંત્રી ભુપેન્દ્ર પટેલને સદસ્ય પ્રાથમિક સદસ્ય બનાવ્યા
