નેપિયનથી હાઉસ ઓફ કોમન્સમાં સાંસદ ચંદ્ર આર્યએ શુક્રવારે સંસદને સંબોધિત કરતી વખતે પણ આનો ઉલ્લેખ કર્યો હતો. તેમણે ગૃહમાં કહ્યું કે, ‘કેનેડામાં ખાલિસ્તાની ઉગ્રવાદ અંગે રિપોર્ટિંગ કરનારા પત્રકારો પર થયેલા હુમલાઓથી હું ખૂબ જ ચિંતિત છું.’ મોડું થાય તે પહેલાં આનો સખત રીતે સામનો કરવો પડશે.

‘પત્રકારોને જાનથી મારી નાખવાની ધમકીઓ મળી રહી છે’

સાંસદ ચંદ્ર આર્યએ થોડા દિવસો પહેલા કેનેડાના રેડ એફએમ કેલગરીના ઋષિ નાગર પર થયેલા હુમલાનો પણ ઉલ્લેખ કર્યો હતો. તેમણે કહ્યું કે ખાલિસ્તાની આતંકવાદીઓ દ્વારા ગ્રેટર ટોરોન્ટો વિસ્તારમાં અને સમગ્ર કેનેડામાં ઘણા વધુ હુમલા કરવામાં આવ્યા છે. આની સાથે સમયસર કડક કાર્યવાહી થવી જોઈએ. તેમણે કહ્યું કે ખાલિસ્તાની ઉગ્રવાદ પર રિપોર્ટિંગ કરનારા નીડર પત્રકારોને જાનથી મારી નાખવાની ધમકીઓ મળી રહી છે.

તેમણે યાદ અપાવ્યું કે અગાઉ માર્ચ 2023માં ખાલિસ્તાન વિરોધને કવર કરવા માટે સમીર કૌશલ પર હુમલો કરવામાં આવ્યો હતો. તેમણે કહ્યું કે આ સિવાય ફેબ્રુઆરી 2022માં બ્રેમ્પટન રેડિયો હોસ્ટ દીપક પુંજ પર પણ હુમલો થયો હતો. ખાલિસ્તાન સંબંધિત હિંસાની ટીકા કરવા બદલ આતંકવાદીઓ દ્વારા તેમના સ્ટુડિયો પર પણ હુમલો કરવામાં આવ્યો હતો.

નિજ્જરની હત્યા બાદ ભારત અને કેનેડા વચ્ચે તણાવ વધી ગયો હતો

કેનેડિયન સાંસદે કહ્યું કે પત્રકાર મોચા બેઝિર્ગનને ખાલિસ્તાની ઉગ્રવાદીઓ પર નિર્ભય અહેવાલ આપવા બદલ જાનથી મારી નાખવાની ધમકીઓ મળી છે. ગયા વર્ષે સપ્ટેમ્બરમાં ખાલિસ્તાની ઉગ્રવાદી હરદીપ સિંહ નિજ્જરની હત્યા બાદ કેનેડા અને ભારત વચ્ચે તણાવપૂર્ણ વાતાવરણ હતું. કેનેડાના વડાપ્રધાન જસ્ટિન ટ્રુડોએ નિજ્જરની હત્યામાં ભારતીય એજન્ટોની સંડોવણી હોવાનો આરોપ લગાવ્યો હતો.

જોકે, આ પછી ભારતે જસ્ટિન ટ્રુડોના આરોપોને વાહિયાત ગણાવીને ફગાવી દીધા હતા. ભારતનું કહેવું છે કે કેનેડા તેની ધરતી પર ખાલિસ્તાન સમર્થક તત્વોને સુરક્ષિત જગ્યા આપી રહ્યું છે. નિજ્જરને ભારત સરકારે આતંકવાદી જાહેર કર્યો હતો. ગયા વર્ષે 18 જૂનના રોજ, બ્રિટિશ કોલંબિયામાં પણ તેની ગોળી મારીને હત્યા કરવામાં આવી હતી.

આ પણ વાંચો: અગ્નિવીરોના મોત પર Rahul Gandhiએ કેન્દ્ર સરકાર પર કર્યો પ્રહાર, કહ્યું- ભાજપ સરકાર નિષ્ફળ રહી