આ તકે ઇસુદાન ગઢવીએ જણાવ્યુ હતુ કે આજે ખેડૂતો અનેક સમસ્યાઓથી ઘેરાયેલા છે. રસ્તા, સિંચાઈ, વીજળી અને ખેતીના પ્રશ્નોથી ખેડૂતો પરેશાન છે. તેમણે કહ્યું કે દુનિયા આજે ચંદ્ર અને મંગળ સુધી પહોંચી ગઈ છે, પરંતુ અહીં ખેડૂતો હજુ પણ મૂળભૂત સુવિધાઓ માટે સંઘર્ષ કરી રહ્યા છે. ખેડૂતોને તેમની ઉપજનો યોગ્ય ભાવ મળતો નથી અને ઘણીવાર મુશ્કેલીઓનો સામનો કરવો પડે છે. તેમણે વધુમાં જણાવ્યું કે ખેડૂતોને પોતાના હક્ક માટે અવાજ ઉઠાવવો પડે તો તેમને રોકવામાં આવે છે, જ્યારે મોટી કંપનીઓને સરળતાથી તમામ સુવિધાઓ મળી જાય છે. સરકાર ખેડૂતો માટે પૂરતી કામગીરી કરતી નથી, જેના કારણે ખેડૂતોમાં અસંતોષ વધતો જઈ રહ્યો છે. તેમણે સરકારને અનુરોધ કર્યો કે ખેડૂતોના પ્રશ્નોનો તાત્કાલિક ઉકેલ લાવવામાં આવે, જેમાં જમીન સંબંધિત પ્રશ્નો, પાણી અને વીજળીની સમસ્યાઓનો સમાવેશ થાય છે. તેમણે ભારપૂર્વક જણાવ્યું કે ખેડૂતો દેશની રીડ છે અને તેમના પ્રશ્નોનું નિરાકરણ લાવવું સરકારની પ્રથમ જવાબદારી હોવી જોઈએ. વધુમાં જણાવ્યુ હતુ કે જે પોતાના હક અને અધિકાર માટે બોલી શકતા નથી, તે લોકો ગુલામ સમાન છે. ગુજરાતમાં જે પરિસ્થિતિ ઊભી થઈ રહી છે તે ખૂબ જ ચિંતાજનક છે. ભાજપના ઘણા નેતાઓ પોતે ચૂંટણી જીતી શકે એવી સ્થિતિમાં ન હોવાથી, લગભગ 700 જેટલી બેઠકો બિનહરીફ બનાવવા માટે પ્રયત્ન કરી રહ્યા છે. આ રીતે ગુજરાતને બિહાર જેવી પરિસ્થિતિ તરફ ધકેલવામાં આવી રહ્યું છે. હવે જાગવાની જરૂર છે. વિરોધ પક્ષના ઉમેદવારોને પકડીને, ધમકી આપી અને દબાણ કરીને તેમના ફોર્મ પાછા ખેંચાવવાની કોશિશ કરવામાં આવી રહી હતી. જો કોઈને ભાજપ બહુ સારી લાગે છે, તો ભાજપ સામે અપક્ષ તરીકે ફોર્મ ભરીને જોઈ લો, બીજા જ દિવસે ભાજપની સાચી હકીકત સામે આવી જશે. વધુમાં જણાવ્યુ હતુ કે પંજાબમાં આમ આદમી પાર્ટીની સરકાર ખેડૂતોને મફત અને દિવસ દરમિયાન વીજળી આપી રહી છે. જો આવનાર ચૂંટણીમાં આમ આદમી પાર્ટીની જીત થશે તો ખેડૂતોના હિતમાં નિર્ણય લેવાશે તેવો વિશ્વાસ વ્યક્ત કર્યો હતો.

આ પણ વાંચો: Shahbaz Sharifની બચી ગઈ ઈજ્જત! સાઉદી પ્રિન્સે ગરીબ પાકિસ્તાનને 2 બિલિયન આપ્યા ડોલર