15904 ચંદીગઢ ડિબ્રુગઢ એક્સપ્રેસ ઉત્તર પૂર્વીય રેલ્વેમાં ગોંડા-માનકાપુર રેલ્વે સેક્શન વચ્ચે પાટા પરથી ઉતરી ગઈ હતી. અગાઉ ચાર લોકોના મોતના અહેવાલ હતા પરંતુ બાદમાં રેલવેએ માત્ર 2ના મોતની પુષ્ટિ કરી હતી. ઘાયલોને ગોંડા જિલ્લા હોસ્પિટલમાં દાખલ કરવામાં આવ્યા છે.

રેલ્વે મંત્રાલયે અકસ્માત પાછળનું કારણ શોધવા માટે કમિશનર ઓફ રેલ્વે સેફ્ટી (સીઆરએસ) દ્વારા ઉચ્ચ સ્તરીય તપાસનો આદેશ આપ્યો છે. નોર્થ ઈસ્ટર્ન રેલવેએ પણ અલગથી તપાસના આદેશ આપ્યા છે.

રેલ્વેએ મૃતકોના પરિવારજનોને રૂ. 10 લાખ, ગંભીર ઇજાગ્રસ્તોને રૂ. 2.5 લાખ અને નાની ઇજાવાળાઓને રૂ. 50,000ની સહાયની જાહેરાત કરી છે. જનરલ મેનેજર, નોર્થ ઈસ્ટર્ન રેલ્વે, સૌમ્યા માથુર; ડિવિઝનલ રેલ્વે મેનેજર/લખનૌ આદિત્ય કુમાર અને અન્ય વરિષ્ઠ રેલ્વે અધિકારીઓ સ્થળ પર હતા. રાહત અને બચાવ કાર્ય યુદ્ધના ધોરણે ચાલી રહ્યું છે.

રાહત કમિશનર રેલ્વેના જણાવ્યા અનુસાર, કુલ 23માંથી 21 કોચ પાટા પરથી ઉતરી ગયા હતા જેમાં 5 પેન્ટ્રી કારની સાથે એસી હતા.

જો કે, અહેવાલોમાં કહેવામાં આવ્યું છે કે આ ઘટના પાછળ પાટા પર પાણી ભરાઈ જવાનું કારણ હોઈ શકે છે, જોકે ટ્રેન સાવધાની સાથે ચાલી રહી હતી. એનડીઆરએફ અને એસડીઆરએફની ટીમોએ એસી કોચની અંદર ફસાયેલા મુસાફરોને બચાવવામાં મદદ કરી હતી.

નોર્થ ઈસ્ટર્ન રેલ્વેના સીપીઆરઓ પંકજ સિંહે જણાવ્યું કે અયોધ્યા રૂટ પરથી અનેક ટ્રેનોને ડાયવર્ટ કરવામાં આવી છે. મુખ્યમંત્રી યોગી આદિત્યનાથે પણ જિલ્લા અધિકારીઓને ઘટનાસ્થળે દોડી જવા સૂચના આપી છે.