Delhi on High Alert : સ્વતંત્રતા દિવસ નિમિત્તે દિલ્હીમાં હાઈ એલર્ટ જાહેર કરવામાં આવ્યું છે. અહેવાલો અનુસાર, ગુપ્તચર એજન્સીઓને ઈનપુટ મળ્યા છે કે જમ્મુમાં સક્રિય આતંકવાદીઓ દિલ્હી અથવા તેની આસપાસના વિસ્તારોમાં આત્મઘાતી હુમલા કરવાની યોજના બનાવી રહ્યા છે. દિલ્હી ઉપરાંત પંજાબમાં પણ સુરક્ષા દળોને એલર્ટ પર રાખવામાં આવ્યા છે. ગુપ્તચર એજન્સીઓએ આતંકવાદીઓ વચ્ચેની વાતચીતના આધારે ઇનપુટ આપ્યા છે. એજન્સીઓનું કહેવું છે કે એવું જરૂરી નથી કે આ હુમલો સ્વતંત્રતા દિવસના અવસર પર જ થાય. કારણ કે તે દિવસે દરેક જગ્યાએ ભારે સુરક્ષા જવાનો તૈનાત હોય છે, પરંતુ આતંકવાદીઓ એક-બે દિવસ પછી કાર્યવાહી કરી શકે છે.
સૂત્રોનું કહેવું છે કે જમ્મુ-કાશ્મીરના કઠુઆમાં જોવા મળેલા બે શંકાસ્પદ લોકો દિલ્હી તરફ જવાની શક્યતા છે. આ લોકો પાસે હથિયાર પણ છે. એવી આશંકા છે કે આ લોકો પઠાણકોટ તરફ ગયા છે અને ત્યાંથી તેઓ દિલ્હી તરફ પણ આગળ વધી શકે છે. એટલું જ નહીં સુરક્ષા દળો અને એજન્સીઓને આશંકા છે કે આ આતંકવાદીઓ અમરનાથ યાત્રાને પણ નિશાન બનાવી શકે છે. આ સિવાય દિલ્હીની મહત્વની પ્રતિષ્ઠિત સંસ્થાઓને પણ નિશાન બનાવી શકાય છે. છેલ્લા ઘણા સમયથી સુરક્ષા દળો અને એજન્સીઓને આતંકીઓને કાબૂમાં લેવામાં સફળતા મળી રહી છે.
એલર્ટમાં કહેવામાં આવ્યું છે કે આતંકીઓ ભારે ભીડવાળા વિસ્તારોને નિશાન બનાવી શકે છે. વાસ્તવમાં, આ એલર્ટ એવા સમયે જારી કરવામાં આવ્યું છે જ્યારે જમ્મુ ડિવિઝનમાં આતંકવાદીઓની ગતિવિધિઓ વધી છે, જે કાશ્મીરની તુલનામાં શાંતિપૂર્ણ હોવાનું કહેવાય છે. કઠુઆ, ડોડા, ઉધમપુર અને રાજૌરી જેવા જિલ્લાઓમાં આતંકવાદી હુમલામાં વધારો થયો છે. હવે એવી પણ આશંકા છે કે આ આતંકવાદીઓ પંજાબ અને દિલ્હી તરફ આગળ વધી શકે છે.
દિલ્હીમાં હુમલો કરીને આતંકવાદીઓ એ સંદેશ આપવા માંગે છે કે રાજધાની હજુ પણ તેમની પહોંચથી દૂર નથી. અગાઉ પણ ઘણી વખત ઈનપુટ આવ્યા છે અને લશ્કર-એ-તૈયબા અને જૈશ-એ-મોહમ્મદ જેવા સંગઠનો દિલ્હી પર હુમલાની યોજના બનાવી રહ્યા છે. દિલ્હી અને પંજાબ ઉપરાંત જમ્મુ-કાશ્મીરમાં પણ સુરક્ષા દળો હાઈ એલર્ટ પર છે. લાલ ચોક જેવા વિસ્તારોમાં સુરક્ષા દળો તૈયાર છે.
આ પણ વાંચો : Jasdan Kanya Chhatralay Case માં આવતીકાલે HCમાં દાખલ થશે પીટીશન, પીડિતાના વકીલે કરી છે CBI તપાસની માંગ
