રાજ્યના સર્વાંગી વિકાસ માટે સરકાર પ્રતિબદ્ધ છે એમ જણાવીને CM Bhupendra Patelએ કહ્યું કે ગુજરાતના દરેક વિસ્તારના વિકાસના સ્થાનિક પોટેન્શિયલને ધ્યાને રાખીને ઉદ્યોગોને પ્રોત્સાહન માટે વડાપ્રધાનશ્રીના માર્ગદર્શનમાં વાઈબ્રન્ટ ગુજરાત રિજનલ કોન્ફરન્સિસનો પ્રારંભ કરાયો છે. ગુજરાતમાં ચાર રિજનલ કોન્ફરન્સિસનું આયોજન કરાયું છે. આગામી જાન્યુઆરીમાં સૌરાષ્ટ્ર-કચ્છ પ્રદેશની રિજનલ કોન્ફરન્સ રાજકોટમાં યોજાશે અને તેના કારણે કચ્છને ઔદ્યોગિક રોકાણને નવું બળ મળશે.

વિશ્વસ્તરીય શહેરો ઊભાં કરવા માટે વર્ષ ૨૦૪૭ સુધીના આયોજન અંગે જાણકારી આપતા મુખ્યમંત્રીએ ઉમેર્યું હતું કે શહેરોની નજીકના વિસ્તારોના વિકાસ માટે ગ્રોથ હબ મોડેલને લાગુ કરવામાં આવ્યું છે. કચ્છને ગ્રોથ હબ તરીકે વિકસાવવા રિજિયોનલ ઇકોનોમિક પ્લાન તૈયાર કરવામાં આવી રહ્યો છે.

ઓપરેશન સિંદૂર દરમિયાન કચ્છ જિલ્લાના નાગરિકોની ખુમારી બિરદાવીને મુખ્યમંત્રીએ વહીવટીતંત્ર-નાગરિકોના સંકલનની પ્રસંશા કરી હતી. મુખ્યમંત્રીએ ઓપરેશન સિંદૂર દરમિયાન કચ્છીજનોના ખમીર અને દેશ માટે સર્વસ્વ અર્પણ કરવાની રાષ્ટ્ર પ્રથમની ભાવનાને અભિનંદનને પાત્ર ગણાવી હતી.

મુખ્યમંત્રીએ અનુરોધ કર્યો કે નાગરિકો વડાપ્રધાનશ્રીના વર્ષ 2047 સુધીમાં ભારતને વિકસિત રાષ્ટ્ર આત્મનિર્ભર રાષ્ટ્ર બનાવવાના સંકલ્પમાં સહભાગી થાય અને ‘વોકલ ફોર લોકલ’, ‘લોકલ ફોર ગ્લોબલ’ના મંત્રને જીવનમાં ઉતારીને સ્થાનિક વસ્તુઓની ખરીદી કરે. તેઓએ આત્મનિર્ભર ગુજરાતથી આત્મનિર્ભર ભારત બનાવવામાં અગ્રેસર રહેવા નાગરિકોને અપીલ કરી હતી.

ઉચ્ચ અને ટેક્નિકલ શિક્ષણ રાજ્યમંત્રી ત્રિકમભાઈ છાંગાએ પ્રાંસગિક પ્રવચન કરતાં જણાવ્યું હતું કે આજના વિકાસકાર્યોનું લોકાર્પણ અને ખાતમૂહુર્ત એ દેશના વડાપ્રધાન નરેન્દ્રભાઈ મોદી અને ગુજરાતના મુખ્યમંત્રી ભૂપેન્દ્રભાઈ પટેલના કચ્છ પ્રત્યેના વિશેષ પ્રેમ અને લગાવની પ્રતીતિ છે. રાજ્યમંત્રીએ ગુજરાત સરકારના કૌશલ્યવર્ધન સાથે ગુણવત્તાયુક્તના અભિગમને બિરદાવતા જણાવ્યું હતું કે મુખ્યમંત્રી ભૂપેન્દ્ર પટેલના નિર્ણયથી જ કચ્છમાં શિક્ષકોની વિશેષ ભરતી શક્ય બની છે. કચ્છમાં શિક્ષકોની વિશેષ ભરતી પ્રક્રિયાથી અને જ્યાં નોકરી ત્યાં જ નિવૃત્તિના નિર્ણયથી છેવાડાઓના ગામડાઓ સુધી વિદ્યાર્થીઓને ગુણવત્તાયુક્ત શિક્ષણ મળી રહેશે. રોડ રસ્તાઓ સહિત જનકલ્યાણ હેતુથી માળખાકીય સુવિધાઓના વિકાસની ગુજરાત સરકારની વણથંભી યાત્રાની રાજ્યમંત્રીએ પ્રસંશા કરી હતી. રાજ્યમંત્રીએ નાગરિકોને દેશના વિકાસમાં તત્પરતાથી સહભાગી બનવા અનુરોધ કર્યો હતો. કચ્છ જિલ્લાના વિકાસના કાર્યો અંગે રાજ્યમંત્રીએ ગુજરાતના મુખ્યમંત્રીશ્રીનો આભાર માન્યો હતો.

આ પ્રસંગે કચ્છ મોરબી સાંસદ વિનોદભાઈ ચાવડાએ જણાવ્યું હતું કે ગાંધીધામ મહાનગરપાલિકાના દરજ્જાથી આ વિસ્તારમાં નવું પરિવર્તન આવશે. તેઓએ કચ્છના અનેક વિકાસકાર્યોની નોંધ લઈને વડાપ્રધાન નરેન્દ્રભાઈ મોદી અને ગુજરાતના મુખ્યમંત્રી ભૂપેન્દ્રભાઈ પટેલ પ્રત્યે આભારની લાગણી વ્યક્ત કરી હતી. સાંસદએ જણાવ્યું હતું કે, ડબલ એન્જિન સરકારની કચ્છ પ્રત્યેની સતત ચિંતાના લીધે આજે કચ્છમાં પ્રવાસન, ઉદ્યોગ, પ્રવાસન અને પશુપાલન સહિતના ક્ષેત્રમાં અભૂતપૂર્વ વિકાસ થયો છે.

ભુજના ધારાસભ્ય કેશુભાઈ પટેલે વિકાસકાર્યોની ભેટ બદલ મુખ્યમંત્રીનો આભાર વ્યક્ત કરતા જણાવ્યું હતું કે, સરકારે કચ્છ જિલ્લાને વિકાસના ક્ષેત્રમાં અનેક ભેટ આપીને અગ્રેસર રાખ્યો છે. કચ્છ જિલ્લાની અનેક સમસ્યાનું સરકારે સુખદ સમાધાન કર્યું છે જેથી કચ્છીમાડુઓના જીવનમાં હકારાત્મક પરિવર્તન આવ્યું છે. ધારાસભ્યએ કચ્છના વિકાસનો શ્રૈય દેશના વડાપ્રધાન નરેન્દ્રભાઈ મોદી અને ગુજરાતના મુખ્યમંત્રી ભૂપેન્દ્ર પટેલને આપ્યો હતો. તેઓએ કચ્છમાં રોડ રસ્તાઓના વિકાસથી કચ્છમાં મુસાફરી અને પરિવહન સુગમ બનશે એમ જણાવ્યું હતું.

કચ્છ પધારેલા મુખ્યમંત્રીશ્રીનું કચ્છી સંસ્કૃતિ મુજબ કચ્છી પાઘડી અને શાલ દ્વારા સ્વાગત કરવામાં આવ્યું હતું. વિવિધ સંગઠનો, જિલ્લા વહીવટીતંત્રની ટીમ દ્વારા કચ્છ પધારેલા મુખ્યમંત્રીશ્રીનું ભાવભર્યું સ્વાગત કરવામાં આવ્યું હતું.  ઉલ્લેખનીય છે કે કચ્છ જિલ્લામાં આજરોજ વિવિધ વિકાસકાર્યોના લોકાર્પણ અને ખાતમૂહુર્ત થવાથી આંતરિક રસ્તાઓનું નવીનીકરણ થશે. ભુજ શહેરના મહત્વના તમામ રસ્તાઓને ખાતમૂહુર્ત પ્રસંગે આવરી લેવાયા હોય શહેરના નાગરિકોને ઉત્તમ પરિવહન સુવિધા ઉપલબ્ધ થશે. મુખ્યમંત્રીશ્રીએ માર્ગ અને મકાન વિભાગ(રાજ્ય) દ્વારા રૂ. ૩૯૩.૩૯ કરોડના ૨૩ કામોનું ખાતમૂહુર્ત, વન વિભાગના રૂ. ૨.૬૦ કરોડના છારી ઢંઢ અને પડાલા મેન્ગ્રુવ લર્નિંગ સેન્ટરના વિકાસકામનું લોકાર્પણ, સિંચાઈ વિભાગ દ્વારા રૂ. ૬ કરોડથી વધુના ખર્ચે કચ્છના વિવિધ ગામના તળાવ સુધારણાના કામોનું ખાતમૂહુર્ત, શિક્ષણ વિભાગ દ્વારા કચ્છના ગુનેરી ખાતે રૂ. ૩.૧૯ કરોડના ખર્ચે નવીન માધ્યમિક શાળાનું લોકાર્પણ, જીએસઆરડીસી દ્વારા રૂ. ૪૨.૫૦ કરોડના ખર્ચે ભુજ-મુન્દ્રા રોડ અને રૂ.૧૯.૭૨ કરોડના ખર્ચે ભુજ-નખત્રાણા રોડના મજબૂતીકરણ અને રિસર્ફેસિંગના કામનું ખાતમૂહુર્ત  અને માર્ગ અને મકાન પંચાયત વિભાગના રૂ. ૨૬.૫૨ કરોડના ખર્ચે વિવિધ રોડના રિસર્ફેસિંગ કામોની ભેટ કચ્છવાસીઓને આપી હતી.

આ કાર્યક્રમમાં જિલ્લા પંચાયત પ્રમુખ જનકસિંહ જાડેજા, અબડાસા ધારાસભ્ય પ્રદ્યુમ્નસિંહ જાડેજા, અગ્રણી દેવજીભાઈ વરચંદ, ભુજ નગરપાલિકા પ્રમુખ રશ્મિબેન સોલંકી, ભુજ તાલુકા પંચાયત પ્રમુખ વિનોદભાઈ વરસાણી, કચ્છ કલેક્ટર આનંદ પટેલ સહિત અધિકારીઓ, પદાધિકારીઓ અને નગરજનો મોટી સંખ્યામાં ઉપસ્થિત રહ્યા હતા.