Uttar Pradesh : ચાઈનીઝ લસણનો (Chinese garlic) મુદ્દો દેશમાં ચિંતાનો વિષય બની રહ્યો છે. તાજેતરમાં યુપીમાં પકડાયેલા ચાઈનીઝ લસણથી આ ચિંતામાં વધારો થયો છે. આ અંગે અલ્હાબાદ હાઈકોર્ટમાં PIL પણ દાખલ કરવામાં આવી છે, જેમાં લસણની ગુણવત્તા અને સ્વાસ્થ્ય પર તેની અસરો પર ધ્યાન આપવામાં આવ્યું છે. ત્યારે ઉત્તર પ્રદેશમાં ચાઈનીઝ લસણ વિરુદ્ધ અલ્હાબાદ હાઈકોર્ટની લખનૌ બેંચમાં અરજી દાખલ કરવામાં આવી છે. આ અરજી વકીલ મોતીલાલ યાદવે દાખલ કરી છે. મોતીલાલે કોર્ટને જણાવ્યું કે ચાઈનીઝ લસણને કારણે થતા રોગને જોતા તેના પર પ્રતિબંધ લગાવવામાં આવ્યો હતો, પરંતુ હાલમાં તેનું આડેધડ વેચાણ થઈ રહ્યું છે. તેને નેપાળ થઈને ભારત લાવવામાં આવી રહ્યું છે.
ફૂડ સેફ્ટી એન્ડ ડ્રગ વિભાગના વડાને કોર્ટમાં બોલાવ્યા
આ અરજીની સુનાવણી દરમિયાન હાઈકોર્ટે ફૂડ સેફ્ટી એન્ડ ડ્રગ વિભાગના વડાને કોર્ટમાં સમન્સ પાઠવ્યા છે. સુનાવણી દરમિયાન કોર્ટમાં ચાઈનીઝ લસણ અને દેશી લસણ મંગાવ્યું હતું. પીઆઈએલ દાખલ કરનાર એડવોકેટે લખનૌના ચિનહાટ માર્કેટમાંથી ચાઈનીઝ લસણ ખરીદ્યું હતું જે તેણે કોર્ટને પણ બતાવ્યું હતું. આ મામલે આજે પણ સુનાવણી હાથ ધરવામાં આવશે. ફૂડ સેફ્ટી એન્ડ ડ્રગ વિભાગના વડા આજે કોર્ટમાં બંને પ્રકારના લસણની તપાસ કરશે.
કોર્ટે કર્યા આ સવાલ
કોર્ટે શુક્રવારે ઉત્તર પ્રદેશ સરકારના ફૂડ સેફ્ટી એન્ડ ડ્રગ એડમિનિસ્ટ્રેશન વિભાગના નામાંકિત અધિકારીને સમન્સ પાઠવ્યું અને પૂછ્યું કે પ્રતિબંધિત ‘ચાઈનીઝ લસણ’ હજુ પણ બજારમાં કેવી રીતે ઉપલબ્ધ છે. કોર્ટની લખનૌ ખંડપીઠે કેન્દ્રના વકીલને દેશમાં આવી વસ્તુઓના પ્રવેશને રોકવા માટેની ચોક્કસ પદ્ધતિ વિશે અને તેના પ્રવેશના સ્ત્રોતને શોધવા માટે કોઈ કવાયત કરવામાં આવી છે કે કેમ તે અંગે પણ પ્રશ્ન કર્યો હતો.
દેશમાં ચાઈનીઝ વસ્તુઓનું વેચાણ બંધ કરવાની માંગ
વકીલની પીઆઈએલ સીબીઆઈને ભારતીય બજારમાં પ્રતિબંધિત ચાઈનીઝ લસણની નિકાસ અને વેચાણની તપાસ કરવા અને દોષિત અધિકારીઓ અને અન્ય ગુનેગારો સામે યોગ્ય કાયદાકીય કાર્યવાહી કરવા માટે પણ નિર્દેશ માંગે છે. પીઆઈએલમાં દાવો કરવામાં આવ્યો છે કે ચાઈનીઝ લસણ જંતુનાશકો અને રસાયણોનો ઉપયોગ કરીને બનાવવામાં આવે છે. આના કારણે કેન્સરનો ખતરો પણ રહે છે. નોંધનીય છે કે ચીન વિશ્વમાં લસણનું સૌથી વધુ ઉત્પાદન કરતો દેશ છે.
આ પણ વાંચો : Haryana news: હરિયાણામાં વોટિંગ પહેલા જ કોંગ્રેસના ઉમેદવાર પર ED નો સકંજો, કરોડોની સંપત્તિ જપ્ત
