સૂત્રોએ જણાવ્યું કે હસીના એક નવા મુકામ તરફ આગળ વધી છે પરંતુ તેનું આગામી મુકામ ક્યાં હશે તે અંગે કોઈ માહિતી આપવામાં આવી નથી. શેખ હસીના યુએઈ, સાઉદી અરેબિયા અથવા કતારને તેના આગામી સ્થળ તરીકે જોઈ રહી છે અને ત્યાં તે શરણ લેશે તેવી ચર્ચા ચાલી રહી છે પરંતુ હજુ સુધી તે સ્પષ્ટ નથી થયું કે તે આમાંથી કયા મુસ્લિમ દેશોમાં શરણ લેવા જઈ રહી છે. અમેરિકા અને બ્રિટને ટેકનિકલી રીતે હસીનાને આશ્રય આપવાનો ઈન્કાર કરી દીધો છે.

દરમિયાન, શેખ હસીનાના પુત્ર સજીબ વાઝેદ જોયે ગુરુવારે કહ્યું હતું કે બાંગ્લાદેશમાં લોકશાહી પુનઃસ્થાપિત થતાંની સાથે જ તેમની માતા તેમના દેશમાં પરત ફરશે. તેમણે કહ્યું કે તેમના દેશમાં અશાંતિ ફેલાવવામાં પાકિસ્તાનની ગુપ્તચર સંસ્થા ISIનો હાથ છે. પીટીઆઈ સાથેના એક વિશિષ્ટ ઈન્ટરવ્યુમાં જોયે જણાવ્યું હતું કે 76 વર્ષીય હસીના ચોક્કસપણે બાંગ્લાદેશ પરત ફરશે, તે હજુ નક્કી નથી કે તે નિવૃત્ત નેતા તરીકે પરત ફરશે કે સક્રિય નેતા તરીકે.

તેમણે એમ પણ કહ્યું કે શેખ મુજીબ (શેખ મુજીબુર રહેમાન) પરિવારના સભ્યો ન તો તેમના લોકોને છોડી દેશે અને ન તો પીડિત અવામી લીગને લાચાર છોડશે. જોયે તેની માતાની સુરક્ષા માટે વડા પ્રધાન નરેન્દ્ર મોદી અને તેમની સરકારનો આભાર વ્યક્ત કર્યો અને ભારતને આંતરરાષ્ટ્રીય અભિપ્રાય ઘડવા અને બાંગ્લાદેશમાં લોકશાહીની પુનઃસ્થાપના માટે દબાણ કરવામાં મદદ કરવા અપીલ કરી.

તેણે કહ્યું, “હા, એ સાચું છે કે મેં કહ્યું હતું કે તે બાંગ્લાદેશ પરત નહીં ફરે. પરંતુ દેશભરમાં અમારા નેતાઓ અને પાર્ટી કાર્યકર્તાઓ પર સતત હુમલાને પગલે છેલ્લા બે દિવસમાં ઘણું બદલાઈ ગયું છે. અમે અમારા લોકોને સુરક્ષિત રાખવા માટે હવે જે કંઈ પણ કરવું પડશે તે કરીશું. અમે તેમને એકલા છોડીશું નહીં,” જોયે ફોન પર કહ્યું, “આવામી લીગ બાંગ્લાદેશમાં સૌથી મોટી અને સૌથી જૂની રાજકીય પાર્ટી છે, તેથી અમે અમારા લોકોથી દૂર જઈ શકીએ નહીં. લોકશાહી પુનઃસ્થાપિત થયા પછી તે (હસીના) ચોક્કસપણે બાંગ્લાદેશ પરત ફરશે.

આ પણ વાંચો : Chhota Udepur : નસવાડીમાં ખરીદ વેચાણ સંઘની ચૂંટણીમાં ભાજપના બે જૂથ આમને સામને, મેન્ડેટવાળા ઉમેદવારની થઇ જીત