Arvind Kejriwal Resignation : દિલ્હીના મુખ્યમંત્રી અરવિંદ કેજરીવાલ (Arvind Kejriwal) આજે મંગળવારે રાજીનામું આપી શકે છે. આ પહેલા સવારે 11:30 વાગ્યે આમ આદમી પાર્ટી (AAP)ની ધારાસભ્ય દળની બેઠક યોજાવાની છે. આ બેઠકમાં આમ આદમી પાર્ટીના તમામ ધારાસભ્યો હાજર રહેશે. આ બેઠકમાં જ દિલ્હીના આગામી મુખ્યમંત્રીનું નામ નક્કી કરવામાં આવશે. આ પછી કેજરીવાલ સાંજે 4.30 વાગ્યા સુધી લેફ્ટનન્ટ ગવર્નર વીકે સક્સેનાને મળી શકે છે અને આ દરમિયાન તેઓ રાજીનામું આપે તેવી શક્યતા છે.
કેજરીવાલ આજે રાજીનામું આપશે
તમને જણાવી દઈએ કે એક્સાઇઝ પોલિસી કેસમાં તિહાડ જેલમાંથી જામીન પર છૂટ્યા બાદ AAPના રાષ્ટ્રીય સંયોજક અરવિંદ કેજરીવાલે રવિવારે કહ્યું હતું કે તેઓ 48 કલાકની અંદર રાજીનામું આપી દેશે અને દિલ્હીમાં વહેલી ચૂંટણીની માંગ કરશે. તેમણે કહ્યું હતું કે જ્યાં સુધી લોકો તેમને “ઈમાનદારીનું પ્રમાણપત્ર” નહીં આપે ત્યાં સુધી તેઓ મુખ્યમંત્રીની ખુરશી પર બેસશે નહીં. કેજરીવાલે કહ્યું હતું કે તેઓ થોડા દિવસોમાં AAP ધારાસભ્યોની બેઠક કરશે અને પાર્ટીમાંથી કોઈ નેતા મુખ્યમંત્રી બનશે.
ગઈકાલે પણ થઈ હતી બેઠકો
આમ આદમી પાર્ટીએ સોમવારે અનેક બેઠકો યોજી હતી. કેજરીવાલે તેમના સત્તાવાર નિવાસસ્થાને રાજકીય બાબતોની સમિતિ (PAC)ના સભ્યો સાથે ‘વન-ઓન-વન’ બેઠકો કરી, જે પાર્ટીની સર્વોચ્ચ નિર્ણય લેતી સંસ્થા છે અને આગામી મુખ્ય પ્રધાન અંગે તેમનો અભિપ્રાય માંગ્યો હતો. તેમણે મુખ્ય પ્રધાન પદ માટે પક્ષની પસંદગી વિશે ભૂતપૂર્વ નાયબ મુખ્ય પ્રધાન મનીષ સિસોદિયા અને રાજ્યસભાના સભ્ય રાઘવ ચઢ્ઢા સહિતના વરિષ્ઠ નેતાઓને મળ્યા હતા.
આ નેતાઓ પર સસ્પેન્સ
પાર્ટીના આંતરિક સૂત્રોએ જણાવ્યું કે દિલ્હીના મંત્રીઓ આતિશી, ગોપાલ રાય, કૈલાશ ગેહલોત અને સૌરભ ભારદ્વાજના નામ મુખ્યમંત્રી પદના સંભવિત દાવેદાર તરીકે ચર્ચામાં છે. તેમણે જણાવ્યું કે કેજરીવાલની પત્ની સુનીતા કેજરીવાલ અને વિધાનસભા અધ્યક્ષ રામ નિવાસ ગોયલને પણ દાવેદાર માનવામાં આવે છે. તેમણે કહ્યું કે દિલ્હી વિધાનસભાના ડેપ્યુટી સ્પીકર રાખી બિરલાન અને કોંડલીના ધારાસભ્ય કુલદીપ કુમાર પણ સંભવિત દાવેદાર છે.
લઘુમતી સીએમ પર પણ ચર્ચા
AAP સૂત્રોએ જણાવ્યું હતું કે આ સિવાય લઘુમતી સમુદાયના કોઈપણ સભ્યને પણ મુખ્યમંત્રી બનાવી શકાય છે કારણ કે 2020ના દિલ્હી રમખાણો પછી પાર્ટીને સમુદાયમાં તેના સમર્થનમાં ઘટાડો જોવા મળ્યો છે. તેમણે કહ્યું કે આવા સંજોગોમાં દિલ્હીના મંત્રી ઈમરાન હુસૈન ચૂંટાય તેવી પણ શક્યતા છે. ભારતીય જનતા પાર્ટી (BJP) એ કહ્યું છે કે આમ આદમી પાર્ટી (AAP)ના વડા અરવિંદ કેજરીવાલનું મુખ્યમંત્રી પદ પરથી રાજીનામું “સિદ્ધાંતો” અનુસાર નથી પરંતુ “મજબૂરી”માંથી લેવામાં આવેલ નિર્ણય છે.
આ પણ વાંચો: PM Modi’s birthday : 800 કિલો બાજરીથી પીએમ મોદીની અદભૂત તસવીર બનાવી, 13 વર્ષની બાળકીના નામે વર્લ્ડ રેકોર્ડ
