Arvind Kejriwal Judicial Custody: દિલ્હીના મુખ્યમંત્રી અરવિંદ કેજરીવાલની (Arvind Kejriwal) મુશ્કેલીઓ ઓછી થવાનું નામ નથી લઈ રહી. દિલ્હીની કોર્ટે (Delhi Court) બુધવારે (11 સપ્ટેમ્બર) મુખ્યમંત્રી અરવિંદ કેજરીવાલની ન્યાયિક કસ્ટડી 25 સપ્ટેમ્બર સુધી લંબાવી છે. આ સાથે જ દિલ્હીની કોર્ટે આમ આદમી પાર્ટીના નેતા દુર્ગેશ પાઠકને એક્સાઇઝ પોલિસી કેસમાં જામીન આપી દીધા છે. AAP નેતાને 1 લાખ રૂપિયાના બોન્ડ પર જામીન આપવામાં આવ્યા છે.
અરવિંદ કેજરીવાલની જ્યુડિશિયલ કસ્ટડી ફરી લંબાવાઈ
સીએમ અરવિંદ કેજરીવાલ અને અન્ય અટકાયત કરેલા લોકો તિહાર જેલમાંથી જ વીડિયો કોન્ફરન્સિંગ દ્વારા કોર્ટમાં હાજર થયા હતા. સુનાવણી દરમિયાન સીએમ કેજરીવાલની કસ્ટડી 25 સપ્ટેમ્બર સુધી લંબાવવામાં આવી હતી. નોંધનીય છે કે વરિષ્ઠ વકીલ અભિષેક મનુ સિંઘવી સુપ્રીમ કોર્ટમાં સીએમ અરવિંદ કેજરીવાલના પક્ષમાં લડી રહ્યા છે. સીબીઆઈનો આરોપ છે કે એક્સાઈઝ પોલિસી કેસ સાથે જોડાયેલા કથિત કૌભાંડમાં આમ આદમી પાર્ટીને ગેરકાયદેસર નાણાંનો ફાયદો થયો છે.
કેજરીવાલને સુપ્રિમ કોર્ટમાંથી જામીન મળ્યા બાદ પણ કેમ રહેવું પડી રહ્યું છે જેલમાં ?
તમને જણાવી દઈએ કે EDએ આ વર્ષે 21 માર્ચે દિલ્હી એક્સાઈઝ પોલિસી સંબંધિત મની લોન્ડરિંગ કેસમાં મુખ્યમંત્રી અરવિંદ કેજરીવાલની ધરપકડ કરી હતી. આ પછી જુલાઈમાં સીબીઆઈએ આ કથિત કૌભાંડમાં સીએમ કેજરીવાલ પર ભ્રષ્ટાચારનો આરોપ લગાવ્યો હતો. જે બાદ કેજરીવાલ સુપ્રિમ કોર્ટમાં ગયા હતા અને સુપ્રીમ કોર્ટે 12 જુલાઈના રોજ વચગાળાના જામીન આપ્યા હતા, જેમને આ કથિત મની લોન્ડરિંગ કેસમાં ED દ્વારા ધરપકડ કરવામાં આવી હતી. જો કે સીબીઆઈની ધરપકડના કેસમાં તેને હજુ પણ જેલમાં જ રહેવું પડશે. પહેલા 27 ઓગસ્ટે અને પછી 3 સપ્ટેમ્બરે સીએમ અરવિંદ કેજરીવાલની કસ્ટડી 11 સપ્ટેમ્બર સુધી લંબાવવામાં આવી હતી. હવે ફરીથી તેને 25 સપ્ટેમ્બર સુધી કસ્ટડીમાં રહેવું પડશે.
દુર્ગેશ પાઠકે ભાજપ પર આરોપ લગાવ્યો
દિલ્હીની રાઉઝ એવન્યુ કોર્ટે AAP નેતા દુર્ગેશ પાઠક અને અન્યને 1 લાખ રૂપિયાના જામીન બોન્ડ પર જામીન આપ્યા હતા. ત્યારે જામીન મળ્યા બાદ દુર્ગેશ પાઠકે કહ્યું કે, તેઓ ઘણા વર્ષોથી આ ડ્રામા જોઈ રહ્યા છે. તેમણે આરોપ લગાવ્યો કે પીએમ મોદી ખોટા કેસ દ્વારા આમ આદમી પાર્ટીને બરબાદ કરવા માંગે છે. પરંતુ, હવે સત્ય બહાર આવી રહ્યું છે. બધાને જામીન મળી રહ્યા છે અને દરેક જેલમાંથી બહાર આવી રહ્યા છે.
